Asmaradana Sangu Mati

Urip ing donya tan lami
Aja dhemen numpuk bandha
Elinga tembe burine
Lamun mati tan ginawa
Kejaba ngamal jariyah
Mula senenga tetulung
Marang sepadhaning gesang

Lelabuhaning Sang Guru

Mungguhing aku,
Panjenengan iku satriya utama
Senajan sepi ing dedeg kang pideksa
Mungguhing aku,
Panjenengan iku satriya prawira
Senajan sepi ing wadya bala
Mungguhing aku,
Panjenengan iku luhur lan mulya
Senajan dudu raja utawa narendra
     Lakunira kang sepi ing pamrih
     Sabarira kang tanpa winates
     Panggulawenthahira kang sepi ing panjaluk
     Mujudake gegambaraning labuhira
     Minterake para siswa
     Amrih bisa memangun negara lan bangsa
     Setatar kelawan negara maju liya
Wis tinurah para sarjana
Kang kasil bisa gawe kuncaraning negara
Awit saka panggulawenthahira
     Dhuh bapa guru..... Dhuh ibu guru....
     Semanten agengipun labet panjenengan dhateng kula
     Kula akeni cubluk kula
     Kula akeni solah bawa kula kang murang tata
     Nanging panjenengan kersa
     Ambilasi manah kula
     Nuntun kula mentas saking segaraning bebodho
     Paring piwulang
'    Paring ngelmu ingkang sanget migunani
Dhuh bapa guru.... Dhuh ibu guru....
Sembah pangabekti kula katur dhumateng panjenengan
Lair tumusing batos
Kula belani ngantos dumugi tumekaning pati

Dhandhanggula Bawa Langgam Nyidhamsari

Dhuh wong ayu pepujaning ati
Kaya ngene wong nandang asmara
Apa ta awakku dhewe
Dhuh dewa jawatagung
Welasa mring wakmami
mBesuk kapan katekan
Jejer lan wong ayu
Upamanirea nakoda
Tanpa prau sasat bisa den pepetri
Nyidhamsari asmara
        Dhuh wong ayu pepujaning ati
        Mung sliramu kang tansah nglelewa
        Rina kelawan wengine
        Rasane wong lagi gandrung
        Amung eling sira wong manis
        Batin ora kuwawa
        Nandang lara wuyung
        Enggala paring usada
        Mring wakmami kang lagya hanyidhamsari
        Uga nandang asmara

PANGKUR Golek Sangu Sowan Mring Ngalam Baka

Ana donya sawetara
Tumindaka maring dhawuh agami
Ayo padha golek sangu
Sowan mring alam baka
Aja sira namung padha ketungkul
Mring endahing ngalam donya
Elinga marang Ilahi

Dhandhanggula Bawa Langgam Sida Asih

Pamintaku nimas sida asih
Atut runtut tansah reruntungan
Ing sarina sawengine
Datan ginggang sarambut
Lamun adoh caket ing ati
Yen cedhak tansah mulat
Sida asih tuhu
Pindha mimi lan mintuna
Ayo nimas bareng anetepi wajib
Sida asih bebrayan