Bagas Bocah Sumeh Perangan 2

Tekan sekolahan, sawise markirake sepedhane, Bagas tumuju ing kelase, kelas 7C. Ing kono, Adit wis lungguh-lungguh ing ngarep kelase.
"Wis rampung rung?" Adit nakonake PR Basa Jawa.
"Kurang sithik." Bagas mangsuli.
Bagas banjur mlebu kelas, ndelehake tase. Saperangan kancane ana sing sawangane uga lagi umyeg nggarap PR Basa Jawa, amarga mapel Basa Jawa tiba jam sepisanan. Bagas lungguh ing panggone karo ngrampungake PR-e. Rampung nggarape banjur metu kelas. Jejagongan karo kanca-kancane sinambi ngenteni bel mlebu. Banjur krungu swara "Bagas, rene! Pak Hasan njaluk tulung". Bagas diceluk Pak Hasan. Bagas banjur nyedhak lan ngambung astane Pak Hasan. Tangane Bagas tumata ngapurancang banjur matur "Dalem, Pak. Wonten menapa?". "Pak Hasan pundhutke tas sing cementhel neng motor! Motore Pak Hasan neng parkiran. Tas kuwi selehke neng kursi guru ing kelasmu! Pak Hasan arep memburi dhisik." ngendikane Pak Hasan. "Inggih, Pak." ature Bagas.
Pak Hasan minger arep menyang WC guru. Bagas banjur nindakake dhawuhe Pak Hasan. Lagi wae tase Pak Hasan diselehake ing kursi guru, bel mlebu wis muni. Bagas banjur lungguh ing kursine, Adhit mlebu kelas terus lungguh ing jejere. Bocah kelas 7C kuwi pancen wis ndalan. Saben krungu bel mlebu, bocah-bocahe banjur anteng ing jero kelas ngenteni gurune rawuh.
Ora let suwe, Pak Hasan rawuh ing kelas 7C.
"Ayo, disiyapke!" mangkono dhawuhe Pak Hasan.
"Wonten palenggahan piyambak-piyambak, ndedonga kawiwitan." Imam, ketua kelas 7C, nyiyapke kanca-kancane mimpin ndonga.
"Ndedonga paripurna."
"Salah setunggal mimpin nembang Indonesia Raya!", dhawuhe Pak Hasan.
Rampung anggone nembang Indonesia Raya bebarengan, Pak Hasan miwiti piwulangan.
"Sugeng enjang, kelas 7C."
"Sugeng enjang, Pak."
"Bocah-bocah kelas 7C, sawuse Pak Hasan maca jurnal guru minggu wingi, kelas 7C ana PR bab Tembang Macapat Pangkur ta?"
"Inggih, Pak."
"Ayo saiki PR-e dicocogke bareng-bareng! Bagas, coba wangsulana sing nomer siji!"
Siji baka siji soale dicocogake bareng-bareng.
Piwulangan Basa Jawa dina kuwi kelas 7C nyinau tembang macapat Pangkur kang kaserat ing Serat Wulangreh yasane Sunan Paku Buwana IV.
"Gas, mengko awan aku dolan neng omahmu ya?" pitakone Adit.
"Ya sumangga. Arep apa?"
"Ora. Mung arep dolan wae."
"Dhewe?"
"Dhewe."
"Ya. Takenteni."
Pelajaran baka pelajaran dina kuwi wis diayahi. Bel mulih wis keprungu. Sawise Bagas ngambung astane Bu Risma, gurune Matematika, banjur age-age menyang parkiran. Ing parkiran, weruh Adit banjur takon, "Mengko sida arep dolan?". "Sida" mangkono wangsulane Adit karo nuntun sepedhane. Bagas mulih.